ഏതാനും ദിവസങ്ങളായി സംസ്ഥാനത്ത് സ്വർണവില ഇടിഞ്ഞുകൊണ്ടിരിക്കുകയാണ്. പശ്ചിമേഷ്യയിലെ സംഘർഷങ്ങൾക്കിടയിലും ഈ മാസത്തെ ഏറ്റവും താഴ്ന്ന നിലവാരത്തിലാണ് ശനിയാഴ്ച വിൽപ്പന നടന്നത്. വില കുറയുമ്പോൾ സ്വർണം വാങ്ങാൻ ആഗ്രഹിക്കുന്നവർക്ക് സന്തോഷം നൽകുന്നുണ്ടെങ്കിലും സ്വർണത്തിൽ നിക്ഷേപം നടത്തിയവർക്ക് ആശങ്കയാണ്. ആഗോള വിപണിയിൽ നിലവിൽ സ്വർണവില കുറഞ്ഞുകൊണ്ടിരിക്കുകയാണ്. ഇതിന്റെ പ്രതിഫലനമാണ് സംസ്ഥാനത്തും കാണാനാകുന്നത്.
രാജ്യാന്തര വിപണിയിൽ സ്വർണവിലയിൽ ഏതാനും ദിവസത്തിനിടെ 2.36 ശതമാനത്തിന്റെ ഇടിവാണുണ്ടായത്. യു.എസ് ഡോളർ കരുത്താർജ്ജിച്ചതും ബോണ്ട് യീൽഡിലുണ്ടായ വർധനയുമാണ് സ്വർണവില കുറയാൻ പ്രധാന കാരണമായി സാമ്പത്തിക വിദഗ്ധർ ചൂണ്ടിക്കാണിക്കുന്നത്. വില ഇനിയും താഴുമോ എന്നത് പ്രധാനമായും ചില സാങ്കേതിക നിലവാരങ്ങളെ ആശ്രയിച്ചിരിക്കും.
സ്വർണവില ഔൺസിന് 4,494 ഡോളർ എന്ന നിലവാരത്തിന് താഴേക്ക് പോകുകയാണെങ്കിൽ ഹ്രസ്വകാലത്തേക്ക് ഇനിയും വില കുറയാൻ സാധ്യതയുണ്ട്. ഡോളർ കൂടുതൽ ശക്തമാകുകയാണെങ്കിൽ, മറ്റ് കറൻസികൾ ഉപയോഗിക്കുന്നവർക്ക് സ്വർണം വാങ്ങുന്നത് കൂടുതൽ ചെലവേറിയതാകും. ഇത് സ്വർണത്തിന്റെ ഡിമാൻഡ് കുറയ്ക്കുകയും വില വീണ്ടും താഴാൻ കാരണമാവുകയും ചെയ്യും.
പണപ്പെരുപ്പം നിയന്ത്രിക്കാനായി പലിശ നിരക്കുകൾ വർധിപ്പിക്കാനുള്ള സാധ്യത നിലനിൽക്കുന്നത് സ്വർണത്തിന് വെല്ലുവിളിയാണ്. പലിശ നിരക്ക് കൂടുമ്പോൾ നിക്ഷേപകർ സ്വർണത്തേക്കാൾ ബോണ്ടുകൾ പോലുള്ള ലാഭകരമായ മാർഗങ്ങളിലേക്ക് തിരിയുന്നത് വില കുറയാൻ ഇടയാക്കും.
വിലയിൽ താൽക്കാലിക ഇടിവുണ്ടെങ്കിലും ദീർഘകാലാടിസ്ഥാനത്തിൽ സ്വർണവില ഉയരാനുള്ള സാധ്യതകളും തള്ളിക്കളയാനാകില്ല. പശ്ചിമേഷ്യയിലെ സംഘർഷങ്ങൾ ഉൾപ്പെടെയുള്ള ഭൗമരാഷ്ട്രീയ പ്രശ്നങ്ങൾ സ്വർണത്തിന് സുരക്ഷിത നിക്ഷേപം എന്ന നിലയിൽ ഡിമാൻഡ് വർദ്ധിപ്പിച്ചേക്കാം.വിവിധ രാജ്യങ്ങളിലെ കേന്ദ്ര ബാങ്കുകൾ സ്വർണം വാങ്ങുന്നത് തുടരുന്നത് ദീർഘകാലാടിസ്ഥാനത്തിൽ വിലയ്ക്ക് പിന്തുണ നൽകും. പണപ്പെരുപ്പ നിരക്ക് ഉയർന്ന നിലയിൽ തുടരുന്നതും സ്വർണത്തിന്റെ മൂല്യം വർധിപ്പിക്കാൻ സഹായിക്കും.
വിപണിയിൽ നിലവിൽ വലിയ തോതിലുള്ള ചാഞ്ചാട്ടമുള്ളതിനാൽ, നിക്ഷേപകർ പലിശ നിരക്കുകളെയും ഡോളറിന്റെ ചലനങ്ങളെയും സൂക്ഷ്മമായി നിരീക്ഷിക്കണം. വലിയ തുകകൾ ഒന്നിച്ച് നിക്ഷേപിക്കുന്നതിന് പകരം ഘട്ടം ഘട്ടമായി നിക്ഷേപിക്കുന്ന രീതി സ്വീകരിക്കുന്നതാണ് ഉചിതം. ആഗോള സാമ്പത്തിക അനിശ്ചിതത്വങ്ങൾ ദീർഘകാലാടിസ്ഥാനത്തിൽ വില ഉയരാനുള്ള സാധ്യതയിലേക്കാണ് വിരൽ ചൂണ്ടുന്നത്.
Content Highlights: Why is gold price down by 2.36% and silver by 4.52%, and will gold fall below $4,494 and silver slip beyond $68 or finally move upwards? Analysts insights, market outlook